meine Spezin vom Stammtisch
und i, mia vastengan de Wejt nimma
mehr. Wei langsam werd ois
ollawei schräga, sejbst bei uns dahoam!
Mia hom ollawei no denkt,
dass der wo zoit, a oschafft, und
der wo der Schäff is, sogt wos lang
gäht. Aba na, in Garching is jetzat
ois anderst: Des hots ja no nia ned
gebn, dass a Bürgamoasta vo Garching ned sein eigna Haushoit hat
durchdrucka woin im Stodtrat. De Hanni und da Päda, de zwoa ham
aba wirkli so a groß’s und weichs Herz, dass beide nua des
Ollaollabeste füa Garching woin ... und jetzat a ächte Demokratie eiführn
woin nach 36 Johr Sozidiktatur in unsana Stodt. De woin jetzat
wirkli den depperten Stodtrat entscheiden lassn, wos vo den Geschenke,
de wo si de Hanni füa ihre Bürga ausdenkt und scho vasprocha
hot, gmacht werd und wos ned. Des kannt in’d Hosn geh!
De, de wo ganz gscherd san am Stammtisch, sogn dagegn, dass de
zwoa einfach nua z’gstingat san, dass ihr Arbat macha:Wei de oane
hot si ins Repräsentieren valiabt und da anda hockt in seina Realschui
in Ingolstodt und hot dort koan Taschencomputer dabei, damita an
Garchinga Haushoit ausrechnen kannt.
Dass de Stodt koa Pujva nimma mehr im Sackerl hot, des hot si aba
scho rumgsprocha! Des sigt ma ja an jedn Dog, wemma auf’d Stroß
naus gäht und dalebn muaß, dass de Stodt ned amoi mehr a Soiz eikaffa
ko, damit ihre Bürga vom Stammtisch sicha Hoam kemma.
Schuid san natürli de Rodn, da oide Heli und da Manni, de wo unsa
Stodt jahrzehntelang nuntag’wirtschaftet hom. Wer sonst? De Hanni
und da Päda kennan des in zwoa Johr ja ned gschafft hom!
Damit oana jetzat no a Diridari vo da Hanni kriagt, muaßa si scho wos
ganz wos Extrigs eifoin lassn! De Feiawehrla vo Hochbruck woin
scho lang a neichs Feiawehrhaus. Und de warn nachat ganz schlau:
De ham bei ihra Jahreshauptvasammlung de Heizung ausdraht und
de Hanni und an Päda im oidn Feiawehrhaus sauba frian lassn. So koit
wors, dass de Hanni glei wieda ihrn Pelzmantl hot oziagn miaßn.
Und dann ham de Feiawehrler gsogt, dass de Politika ruhig merka soin,
wia koit dass in Hochbruck bei da näxtn Woi wern kannt, wenns
nix fürs neie Feiawehrhaus dean. Ned bläd, oda?!
Nix füa unguad!
Eia Stodtstreicha
|
